Mi nòmber ta Aisha

Ken mi ta? Ken mi ta, ku mi ta sinti asina tantu rabia i ku mi tin miedu di mi propio komportashon i mi pensamentunan? Dor di algu chikitu, for di nada mi rabia por eksplotá. E ta inkontrolabel i e ora ei, na mes momentu mi tin miedu. Miedu di hasi un otro hende daño òf, pió ainda, di mat’e. Mi tin miedu di mi mes i miedu pa loke mi por hasi ku hende.

Nan a yega di abuzá di mi seksualmente. E kos a kuminsá tempu ku mi tabatin mas o ménos 5 aña. E malechor tabata un miembro di famia, pero despues tambe amigu di kas di mi mayornan. E abuzu a dura vários aña. Mi mayornan no tabata sa di nada i nunka mi no a riska konta nan. 
I pakiko bai konta nan awor… e kos a pasa kaba i no por hasi nada mas pa kambi’e. Awor mi tin 21 aña i mi ta biba riba mi mes. Mi ta haña difísil pa sera amistat. Mi ta i hopi bia ta sinti mi mi so.

Poko tempu pasá mi tabatin un pleitu formal ku mi frei, i e ora ei kos a bai robes. Furia a tuma kòntròl di mi i mi no por a kontrolá mi mes mas. Mi wowo a bira skur i mi a atak’é. Sla a kai di tur dos banda, i duru tambe. Mi a herid’é seriamente, i mi tambe tabata blousá. Tabata horibel. Mi tabata spantá, pero teribel furioso tambe.

Mi tin hopi gana di hasi kos bon, pero di bèrdat mi no sa kon. Finalmente, danki Dios tabatin un hende ku a mira ku kos no tabata bai bon ku mi. E persona ei a puntra mi di unda mi mancha blou a sali i e a puntra si mi mester di ayudo. Mi tabata sa ku mi mester a kambia algu den mi mes si mi kier a sali for di e situashon fèrfelu aki. P’esei mi a bisa: ”Sí, mi mester di ayudo”. Huntu nos a buska e ayudo adekuá. Asina mi a yega na punto di konseho i notifikashon violensia doméstiko i maltrato di mucha, Guiami, i mi a konta e trahadó sosial tur kos. Tabata hopi, hopi difísil, pero mi tabata kier hasié. Tabata un alivio grandi ku porfin mi por a kompartí mi storia ku un hende ku mi por a konfia. Huntu ku e trahadó sosial mi a bai investigá kiko mi kier i ken mi kier ta. Tabatin momentunan ku mi kier a muri i no a mira un salida mas. Mi a siña pa no tene e emoshon fuerte aki pa mi mes, pero pa kompartí nan ku mi trahadó sosial i tambe ku un hende di Mental Health Caribbean (MHC). Nan a yuda mi bon.

Bon mirá, bo por bisa ku nan a konstruí un trapi pa mi. Ta na ami pa subi e trapi ei i sali for di e vaye. E ta un trapi largu, pero kada bes mi ta yega un tiki mas leu. Tin bia mi ta kai, pero e trapi ta keda pará i úniko kos ku mi mester hasi ta subié.

Un donjo di trabou hopi preokupá pa un empleado. E a nota ku e no tabata sintié seif i tabatin pensamentu skur. E hende muhé a dun’e pèrmit pa tuma kontakto ku nos, despues di kua mi a traha un sita mesora.

Den nos promé kòmbersashon mi a splika ku lo trata tur kos ku nos diskutí huntu di forma konfidensial i ku mi no ta bai papia ku niun hende tokante su situashon, sin su pèrmit. Tambe mi a splik’e ku huntu kuné mi tabata bai analisá su seguridat i kon nos por traha huntu pa e ta mas seif i ku e por bai sintié mas seif.

E tabata papia i ami tabata hasi pregunta, pero mas tantu mi tabata skucha. Mi a mira e doló i e tristesa den su wowo. Mi a sinti e impotensia i e pèrdida di kòntròl dor di tur loke e mester a pasa aden. Mi a mira miedu i bèrgwensa. Bèrgwensa pa e hende ku e a bira i miedu pa loke ta na kaminda.

Nos a papia vários bia tokante su bida, tokante su miedu i tokante kiko e mester na e momentu aki pa ta seif i pa sintié seif. Naturalmente, nos a papia tambe tokante kiko ta hasié kontentu i tokante kiko ta su soñonan. Tin bia nos tabata bebe un kòpi‘ kòfi un kaminda òf nos tabata sali bai kana.

Pa motibu di e gravedat di su problema i di tur loke e mester a pasa den su bida, mi a konseh’é pa papia ku un sikólogo. Huntu nos a bai su dòkter di kas. E dòkter di kas a referi’é pa MHC i despues tambe pa trahadó sosial denter di Akseso. Asina, paso pa paso e a traha riba su proseso. Un kaminda largu ku subida i bahada.