Violensia doméstiko ta sosodé tur kaminda. Rònt mundu, pues na Boneiru tambe i na e otro islanan den Reino. Ta bin aserka ku violensia doméstiko ta sosodé den tur segmento i grupo di e poblashon.
Den kada ser humano tin un tiki agreshon. E forma ku ta anda ku agreshon, si por varia hopi. Tòg e por pasa ku nos tur. Por sosodé ku un situashon di bida ta kambia di tal forma ku e ta kulminá den violensia. Rekonosé e situashon i violensia, pone bèrgwensa un banda i papia tokante esaki ta nesesario pa kibra un sírkulo di violensia.
Violensia doméstiko ta ser kometé pa un persona den esfera familiar di e víktima, manera: partner, eks partner, miembronan di e famia na kas, miembronan di famia i amigunan di kas. E violensia no nesesariamente mester sosodé den kas. Si un persona keda maltratá riba kaya pa por ehèmpel un èks partner, òf si tin asuntu di ‘stalking’, esei tambe ta kai bou di e denominashon violensia doméstiko.
Banda di violensia di partner, maltrato di mucha, maltrato di grandinan i violensia relashoná ku honor tambe ta kai bou di violensia doméstiko. Hende muhé ta e grupo mas grandi di víktima. Pero hende hòmber, mucha i grandinan tambe ta víktima di violensia doméstiko.
Relashon entre outor i víktima
E konsepto ‘violensia doméstiko’ ta referí na e relashon entre outor i víktima. Mayoria bia tin asuntu di diferensia den poder. E víktima ta dependé di e outor. Ora di violensia doméstiko ta bai pa formanan di violensia físiko, seksual i síkiko.
No ta tur ora ta rekonosé maltrato di e partner sin mas. E kousanan por ta distinto meskos ku forma i grado di violensia. Si a kometé violensia doméstiko kontra un persona por rekonosé esei mas fásil ku maltrato emoshonal, òf violensia verbal.
Kon ta rekonosé e víktima?
- E ta mustra kansá òf hopi bia ta malu
- Ta bisti paña pa tapa (pa skonde heridanan)
- Ta kambia diripiente di aparensia òf paña
- Hopi bia ta parse intrankil òf nèrvioso
- Tin plèki blou, sla òf otro heridanan
Kon ta e komportashon di e víktima?
- Ta defendé su partner
- Ta hasi manera no tin nada partikular
- Ta komportá su mes notablemente diferente ora e partner ta presente
- Ta bira (mas) religioso òf diripiente tin un opinion diferente i fuerte
- Diripiente e ta eksageradamente okupá òf kontrali eksageradamente trankil
- No ta haña ku e bal nada i ta papia negativo di su mes òf di otronan
- Sin motibu bálido e tin miedu, ta rabiá, bruá òf depresivo
Kon e víktima ta anda ku otronan?
- Diripiente e ta anda ménos ku amigu- i famianan
- Ta evitá preguntanan tokante kon ta bai òf ta duna kontestanan vago
- Ta kanselá sita na último momentu
- Ta kita kara ora di kontakto visual
- Ta spanta ora mishi kuné
Den ki situashonnan e víktima ta resultá?
- Ta difísil pa papia kuné so
- No tin splikashon pa herida òf kosnan kibrá
- No tin plaka di su mes, tin debe òf tin mester di e partner pa asuntunan finansiero
- Ta bai dòkter di kas mas frekuente i ta usa píldora pa drumi òf píldora di doló
- Ta usa regularmente droga manera alkohòl i droga
- Ta hasi hopi kos òf nèt kontrali no (mag) hasi hopi kos den kas
